السلام عليكم ورحمه الله وبركاته
اليوم قصتي عن كيف حسيت انه لازم ينزل وزني. وكيف بدايه كل شيء مو سهله أبدا. لما كنت صغيره كنت نحيفه جدا ماشاءالله وكنت احب العب واركض. كانوا أهلي يبغوني اسمن وكانوا يحاولون يعطوني أكل من كل الأنواع على شان شيءواحد الا هو السمنه.
لكن مهما عطوني من اكل لكن مع الحركه بسم الله علي ما اسمن ولله الحمد. وبعدها، طبعا العمر تغير ولما وصلت لعمر المراهقه بديت اسمن شوي شوي. ثم صارت سمنتي مرره عاليه يعني وزني ٨٥ وعمري ١٩ سنه لا وبعد طولي ١٦٠ سم يعني سمنه خطيره.
طبعا، مثل أي بنت ما دريت انه سمينه وانه سمنتي خطيره. كنت استمتع بالاكل ولله الحمد. بدات الناس تتكلم و تقول أشياء. مثل اللي بالبيت معي بدا الوالد يقول فيل ويمسك الأرض انه ما تهتز لما امشي يعني قمه الاستهزا. وغير بنات العم او الخال اللي اجسامهم نحيفه ورشيقه واذا تهاوشت مع وحده منهم تطلع الحقيقه وتطلع الكلمات الجارحه مثل “انتي ما يهمك الا بطنك او انتي فيل.” حتى اذا كانوا نحاف وامهاتهم سمان جدا يعني ما يقدروون ابدا العشره اللي بيننا.
نرجع شوي شوي
بديت الاحظ جسمي غير عن البنات اللي حولي. حتى بالزواجات دايم يقولون اوووه شوفي هذه جسمها خيال يا حظها. ما كنت في البدايه احس باي غيره من غيري لكن المجتمع خلاني اغار من اجسام كثيره.
بديت ابحث عن نوادي على شان انقص وزني على ايامي مافي الا نادي واحد وكان بعيد عن البيت يعني ٢ ساعتين بدون زحمه. النادي حلو لكن ما كنت فاهمه كيف انحف؟ هل لازم احضر كل الكلاسات ولا بس شوي؟
بديت زي المجنونه احضر كل كلاسات الرياضه الى درجه عورت نفسي مره ولا قدرت امشي الا بعصى. كنت مررره ابغى انحف لدرجه كنت اسآل حولي السؤال المعتاد ” ماشاء الله كيف نحفتي؟ ” كانت فيه وحده بالعائله قاهرتني لانها كانت سمينه مثلي واكثر. ثم نحفت فجأة بعد اختفاء هههههه يعني ماشفناها لمده طويله. وسالتها وكانت تحاول تلف وتدور وماتجاوب
وسالت أمها وقالت لي ” ساندويتش ونوم ” ياعمري انا. على وقتها صدقتهم! ولكن كانوا كذابين
في النهايه، حاولت انزل وزني من نفسي! واكتشفت الطريقه الحقيقيه الوحيده لتنزيل أي وزن كان ماشاءالله. ولكن بعد ايش بعد تجارب كثيره جدا. كيف حسيت انه لازم ينزل وزني!
حسيت انه لازم انا اتغير في البدايه كان لناس معينه وكان على شان ناس. لكن تعلمت مع الزمن، التغيير وخصوصا تنزيل الوزن احسن شيءتسويه لنفسك وبس! بلا ناس! بلا هم! لانك انت نفسك هي اللي تستحق الصحه او غير كذا من فخر.